Kico ta e sindroma di demencia?
Demencia ta un malesa di e celebro cu ta progresivo y terminal. Esaki ta significa cu poco poco e persona ta bay experiencia mas dificultad den funcionamento y ta bay depende mas y mas riba ayudo di otro persona pa e por funciona y sobrevivi den sociedad. Demencia por wordo causa dor di diferente malesa. E malesa di mas conoci ta e malesa di Alzheimer cu ta causa e demencia tipo Alzheimer. Pero tambe tin e demencia tipo vascular, demencia tipo lewy body etc.
Ora ta trata di e sindroma di demencia e celnan den e celebro y of e coneccion entre e celnan den e celebro ta kibra. Esaki ta e motibo dicon un persona cu demencia no por funciona bon mas. Durante e transcurso di e malesa mas y mas di e celebro ta deteriora caminda dado momento hasta e funcionan basico di nos organismo ta wordo afecta.
Na comienso di e malesa vooral e problema cu memoria ta sobresali. Despues e persona ta haya problema cu pensamento e idioma. Tambe e persona por experiencia cambio den karakter y actitud. Segun e malesa aki ta avansa e persona por experiencia perdida di control riba su propio bida, e ta bira dependiente y guia y cuido. Tambe por ripara cu abilidadnan cu e ta uza tur dia ta bira menos of ta bay perdi, por ehempel cushina, banja , higiena personal, bisti panja, haci compras, core auto etc.
Te na e momento aki no tin niun remedi pa stop of cura e malesa aki. Si tin algún medicamento pa slow down e proceso. Banda di e tratamento cu remedi por escohe pa (re)activa e persona su abilidadnan, esaki ta wordo yama terapia psycho-social. Un forma di e terapia psycho-social ta wordo brinda na e grupo nan di pasadia na CasMarie. E meta ta pa e persona pasa un dia placentero y sinti su mes util. A la ves e persona su abilidad nan ta wordo activa na un manera placentero
Symptoma psychiatrico
Tin ves symptoma psychiatrico ta compaña e demencia. Por ehempel un persona ta bira desconfia, paranoid, agresivo, e ta halucina of ta scucha stem etc. Si e symptoma nan aki ta causa hopi dificultad pa e persona mes por evalua cu dokter di cas of specialista y busca conseho con por atende esaki. Tambe por evalua e opcion pa trata e symptomanan aki cu remedi. Hopi importante ta pa semper evalua cu dokter prome si e symptoma psychiatrico ta un consecuencia di un problema somatico por ehempel un infeccion. Pa mas informacion por tuma nota di e brochure di informacion “Delirio” y e brochure “halucinacion y pensamento cu no ta cuadra cu realidad”
