Demencia ta un proceso cu ta cuminsa poco poco. Varios biaha no ta visibel pa otro cu e persona ta experiencia dificultadnan. Cerca tur persona cu demencia tardi of trempan ta yega un momento cu no ta responsabel mas pa maneha un vehiculo den trafico. E pregunta principal ta con ta haya sa cu e momento aki a yega? Normalmente un persona cu demencia no tin reflexion propio den nan mesun funcionamento y no lo por sa na tempo si ta responsabel of no pa sigui participa den trafico.
Problema cu maneha den trafico
Hopi importante ta pa por haya e caminda corecto (ruta) y por analisa y actua corecto den diferente situacion di trafico. Persona cu demencia hopi biaha tin dificultad cu e aspectonan aki. Nan ta perde caminda vooral na momento cu bin un cambio den e ruta normal por ehempel un rotonde nobo of un desviacion den ruta. Nan por perde e bista total riba un situacion cual lo por ta causa di situacion peligroso.
Ta responsabel ainda?
Bo persona ta sinti safe den auto hunto cu e pareha tras di stuur? Bo persona ta laga oma of opa busca e yiunan for di scol cu auto? Aki na Aruba no tin un instancia cu por evalua si e persona por maneha responsabel den trafico. Kiermen ta hopi importante pa forma un opinion con responsabel e ser keri ta funciona den trafico y keda evalua esaki critico y frecuente.
Tips cu por uza pa convence un persona cu ta mihor pa e stop di core auto
Hopi importante ta pa trata di splica dicon ta peligroso si e persona sigui maneha e auto den trafico. Trata di nombra situacion concreto cu a pasa cu tawata un peliger of a crea un riesgo. Informa cu ta un peliger pa e persona mes pero tambe un peliger pa otro automobilista. Tin biaha ta haci mas imprecion di un dokter of specialista papia tocante esaki tambe. No perde pasenshi, e tema aki ta uno dificil pa toca y tin biaha ta tuma su tempo pa por convence e persona cu e no por core auto mas.
Tips cu por uza na momento cu e persona no kier stop di core auto
Laga un garashi adapta un pieza pa asina e auto no start mas. Ofrece na e persona cu por hibe tur caminda, asina e ta haya un propio chauffeur. Tin mas chens cu e persona cu demencia no kier core si e no conoce e auto, wak si por cambia e auto pa otro modelo di auto. Busca otro lugar pa para e auto, si e persona no wak e auto of wak e yabi di auto e lo corda kisas menos riba e auto. Semper tene na cuenta cu seguridad den trafico ta lo mas importante.
