E malesa di Alzheimer, Demencia tipo Alzheimer

Kico ta e malesa di Alzheimer?

E malesa di Alzheimer ta un malesa di celebro cu ta incurabel y den cual cel nan den diferente parti di e celebro ta stop di funciona y a degenera. Esaki ta e causa e demencia. E malesa aki a wordo nombra na e dokter Aleman Alois Alzheimer cu den comienso di siglo 20 a descubri cambionan den e celebro di persona cu e fayece cu demencia.

E malesa di Alzheimer ta incurabel y progresivo. Aunke tin hopi research haci riba diferente aspecto di e malesa aki ainda e causa exacto y un tratamento completo no ta conoci. Algun symptoma ta cu e persona ta lubida, cambio den personalidad, desorientacion, dificultad cu expresion verbal / uzo di idioma. E sindroma di demencia no ta causa directamente cu un persona ta fayece, pero indirectamente si esaki ta e caso. Dor di e daño progresivo den e celebro ta bay experiencia cada biaha mas problema den e funcionamento tambe di e diferente organo nan. Esaki lo por conduci cu e persona ta fayece. Por download e brochure Malesa di Alzheimer (PDF) aki.

Mundialmente pero tambe na Aruba ta wordo papia di un aumento di e cantidad di persona cu ta envehece. E grupo aki tin mas riesgo pa desaroya malesa cronico manera e sindroma di demencia. Un porcentahe di 70 % di e grupo cu tin demencia  tin e demencia tipo Alzheimer. Hopi biaha esaki ta cuminsa cu problema chikito di memoria, e persona ta bira menos activo y por ripara cu e ta reacciona menos liher. E dificultad nan aki ta hopi parecido cu e dificultadnan cu por experiencia dor di e envehecimento normal. Un diferencia grandi ta cu e problemanan relaciona na un demencia ta progresivo y ta aumenta den intensidad.

Diferente fase di demencia

E malesa ta dura mas of menos 7 aña desde cu tin un diagnosis, esaki ta un promedio. E manera cu e malesa ta desaroya cu diferente pa cada persona, pa un persona esaki por ta 2 aña y pa otro por ta 15 aña. Aunke e malesa ta pa cada persona diferente por distingui 3 fase den e malesa aki.

E prome fase: problema cognitivo

Lubidamento, desorientacion, cambio den personalidad y un cambio den e velocidad cu ta reacciona ta mayoria biaha e prome señal di un malesa Alzheimer. Hopi biaha e persona ta manera sin smaak, menos spontaneo y ta slow den mantene informacion nobo. Den e fase aki e persona ta capaz di funciona independiente sigur na momento cu ta trata di abilidadnan mas simpel. Pero mayoria biaha nan mester toch di cierto guia verbal. Por ripara cu e expresion verbal ta bira menos. Hopi biaha e persona mes ta trata di camufla e dificultadnan aki. Pa nan mes por ta un iritacion of sufrimento pa experiencia cu tin dificultad.

E di dos fase

E dificultadnan ta visibel y por nota durante e funcionamento cu e persona ta experencia problema. E memoria pa informacion recien ta hopi afecta siendo cu e memoria pa informacion di e pasado ta basta bon manteni ainda.

E di tres fase

Durante e ultimo fase aki e malesa a bai cu parti grandi di e personalidad y capacidad di e patient. Pa e por sobrevivi e persona mester cuido durante henter e dia. Banda di e symptoma nan cognitivo awor tin tambe hopi problema fisico, por ehempel incontinencia, dificultad pa mobilisa, dificultad pa kauw y guli, e persona tin mas riesgo pa pulmonía y otro infeccion, e halamento di rosea ta duna dificultad esaki vooral cerca persona cu ta riba cama henter dia. Inevitablemente esaki nan tur ta conduci na e fase final di e persona su bida, caminda cuido palliativo ta necesario.