Servicio di CasMarie

Fundashon CasMarie ta brinda diferente servicio, tur cu e meta pa mehora e calidad di bida di e persona cu demencia y su famia.

Servicio di pasadia

Nos tin 2 grupo di pasadia, e Memory Group y e Grupo Pasadia

E Memory Group ta specialmente pa persona cu ta experiencia dificultadnan leve y cu por funciona cu un minimo di guia y ayudo durante e dia. E terapia Psycho-social ta consisti di ehercicio fisico. Importancia di cuminsa e dia cu ehercicio fisico ta prueba dor di diferente estudio. Ehercicio regular ta bon pa e celebro y ta mehora e circulashon di sanger den e celebro. Pa es motibo aki ta cuminsa e dia na CasMarie cu un actividad di ehercicio. Despues ta continua cu actividadnan pa activa e funcion di e celebro. Nos ta lunch merdia hunto den grupo pa despues sigui cu diferente wega por ehempel domino, rummikub, carta etc. Durante e dia tin amplio posibilidad pa combersa den grupo of individual, si tin cualkier preocupacion tin oido pa esaki tambe. Tambe nos ta ofrece informacion y nos ta ofrece guia con por maneha cu e dificultadnan. Por ehempel por tuma nota di nos informacion tocante “tips con pa yuda e memoria” (PDF)

Por download e Brochure Memory Group (PDF) akinan.

Pa persona cu ta experiencia dificultadnan mas grandi y mester mas ayudo, sosten y cuido durante e dia tin e opcion pa participa na e Grupo Pasadia. Un dia placentero y un programa varia ta nos punto di salida.

Nos ta trata di reactiva e persona su abilidadnan, di un forma ameno. Nos experencia ta cu ta hopi importante pa un persona sigui experencia exito. Nos ta pone hopi enfasis riba esaki y ta tene cuenta cu e abilidadnan di nos cliente durante e actividadnan cu nos ta brinda. Nos actividadnan ta consisti di actividad fisico, actividad social-emocional y actividad pa stimula e mente. Tambe nos ta yuda mantene e abilidad pa haci tarea chikito den cas of mantencion di e cuido / higiena personal.

contribucion ta varia entre 200 AWG pa luna – 600 AWG pa luna, depende cuanto bes pa siman e persona participa na e pasadia.

Servicio di informacion

CasMarie ta brinda na diferente forma posibilidad pa haya informacion, guia y sosten.

Un meta importante cu CasMarie tin ta pa brinda informacion na pueblo di Aruba. Nos ta trata di logra esaki riba e diferente formanan aki:

Anochi di informacion Dementie Café CasMarie

Nos ta brinda e Dementie Café CasMarie cual ta anochi di informacion tocante demencia. Pa haya un bista di e programa por click aki: DCC jaarprogramma 2014-2015 (PDF).

Cu e servicio aki nos ta brinda un momento di encuentro y informacion pa tur interesado. Por ta cu un persona ta experiencia cambionan den funcionamento propio of cerca un familiar of conocir. Tambe por ta cu un persona ta traha cu persona cu demencia y kier keda altanto di e ultimo desaroyo den cuido. Tur persona ta bon bini na e anochinan aki. Tur anochi tin amplio oportunidad pa haci pregunta tocante e charla of tocante cualkier preocupacion cu por tin.

Informacion via pagina di Facebook

CasMarie Info-Lounge

Den un espacio trankilo tin e oportunidad pa busca informacion tocante demencia sea den buki / revista of digital. Tambe tin e opcion pa wak pelicula tocante demencia. Si ta desea di haci uzo di nos Info-Lounge por traha un cita pa esaki na 584-3375 of 568-2959

Riba peticion pa instancia / scolnan / grupo di 60 plussers etc nos por brinda informacion riba e topico di demencia

Servicio di sosten y guia na famia of individual

CasMarie ta brinda na famia e oportunidad pa participa den un support group / grupo di contacto. E meta di un grupo di sosten ta manera e palabra ta bisa, sostene otro door di comparti tips con pa anda cu un persona cu tin demencia. Tambe e grupo di sosten por ta un “uitlaatpijp” pa e persona cu ta duna cuido por desahoga su mes (su tristesa, su rabia, su inabilidad, etc.). Tambe e por bira un “uitje” pa e persona cu ta duna cuido y asina e ta pafo di e situacion di tur dia y por papia ariba e situacion cu e ta aden sin mester tene cuenta cu ken e ta papia (famialares, amistadnan, etc.) y ta comparti cu otronan cu tambe ta den e mesun situacion cune.
E grupo di contacto ta reuni 1 biaha cada luna ariba e prome diaranson mainta di 9 or pa 10.30 na CasMarie of un biaha cada 2 luna riba e prome diahuebs anochi di 7 or pa 8.30 pm na CasMarie.
Si ta desea di ricibi mas informacion of ta desea di inscribi pa e servicio aki por fabor tuma contacto cu CasMarie na 568-2959 of na 5843375. Pa mas informacion por tuma nota di e brochure di grupo di contacto (PDF grupo di contacto)

Tambe ta posibel pa ricibi sosten y guia door di e psychologo di Fundashon CasMarie. Por haci uzo di e servicio aki pa sesion cu famia, cu e pareha of individual. E malesa di demencia por trece cune cambionan den actitud y funcionamento. Esaki por ta dificil pa comprende y of acepta. E cambionan aki por trece tambe hopi pregunta y inseguridad. Tin biaha por discuti e situacion cu conocirnan y ta sinti alivia despues. Tin biaha esaki no ta e caso pasobra e situacion ta uno hopi compleho. Den e casonan aki ta recomenda pa tuma contacto pa un cita cu e psychologo di CasMarie.

Liña di maneho di e psychologico:

E psychologo ta mantene su mes na e codigo di trabou pa psychologo na Hulanda (Beroepscode NIP).
Necesidad pa consulta ta wordo indica y stipula hunto. Esaki por wordo adapta conhuntamente na cualkier momento durante e proceso di guia.

Servicio di test Neuro-psychologico riba peticion di specialista

Riba peticion di specialista por haci test neuro-psychologico. E testnan aki ta trece claridad riba e abilidad nan actual di e persona y ta yuda pa jega conhuntamente cu e specialista na un diagnosis mas completo. E bateria di test cu ta wordo usa pa esaki ta consisti di testnan valido y special pa midi e diferente funcionnan di e celebro. E resultado di e testnan ta duna un indicacion fuerte di posibel causa pa e problema. Tambe nos ta duna conseho practico na e persona y su famia pa asina yuda mantene e abilidadnan lo mas halto posibel. E resultado y conseho nos ta manda digital pa e specialista cu a pidi e test neuro-psychologico.