Nos tey pa yuda desde e prome momento cu un famia of persona ta sospecha cu por trata di un demencia. Nos ta sigui brinda guia, sosten y of pasadia durante henter e proceso. Tambe nos ta ofrece na tur interesado informacion tocante sindroma di demencia. Ki ora ta papia di un demencia, kico e symptomanan ta, kico mester haci of unda por acudi aki na Aruba pa ricibi ayudo ta algun ehempel di pregunta cu nos ta ricibi.

E meta di CasMarie ta pa aporta na un manera positivo y profesional na e calidad di bida di e persona cu demencia y nan famia. Pa logra nos meta nos ta brinda diferente servicio. Si ta desea por download nos folder pa mas informacion.

Nos centro di encuentro y informacion ta situa na Savaneta 532-A y ta e lugar caminda e servicionan di pasadia ta wordo brinda. Nos tin 2 grupo di pasadia; Memory Group pa esnan cu dificultadnan mas leve y pasadia CasMarie pa persona cu demencia caminda e dificultadnan ta mas avansa y ta depende di ayudo durante dia. Ambos grupo ta wordo (re)activa y stimula pa asina mantene e abilidadnan lo mas largo posibel. Nos ta brinda na ambos grupo un terapia psycho-social cu ta consisti di un combinacion di diferente actividad. Nos ta brinda entre otro actividad fisico, actividad social-emocional, actividad cognitivo, tambe tin actividadnan di obra di man, y oportunidad pa haci diferente wega hunto. Dianan di fiesta nos ta celebra hunto tambe nos ta ricibi varios biaha bishita di Clown Doctors, di Biblioteca Nacional y di Nelson Sprok cu su caha di orgel.

Tambe nos tin diferente servicio pa famia, entre otro nos ta organisa anochi di informacion na Dementie Café CasMarie. Esaki ta wordo organisa 4 biaha pa anja. Pa haya un bista di e programa por fabor click riba e link di esaki. Tambe nos ta brinda sosten y guia na famia. Esaki por den seno familiar of individual. Pa famia cu ta desea di participa den un grupo di contacto pa famia / support group esaki tambe ta posibel. Nos tin 2 grupo; uno den dia y uno anochi. Riba nos website bou di e link Servicionan di CasMarie por haya un bista di tur locual nos ta brinda na pueblo di Aruba.

CasMarie tambe tin un Facebook pagina, like e pagina pa asina por keda tambe up 2 date cu informacion for di CasMarie via Facebook.

E team di CasMarie ta chikito y multi-disciplinario. Nos ta profesional y dynamico. E base cu ta uni nos tur ta e amor pa nos trabou. Nos team ta consisti di un enfermera, dos guia di grupo, un terapista di actividad y un trahado social. Den team di CasMarie nos tin un collega cu ta cushina un lunch delicioso pa tur nos clientenan. Tambe nos tin part-time un personal di housekeeping cu ta yuda nos mantene e lugar. Nos tin actualmente 2 boluntario cu ta yuda nos pa asina nos tur hunto por contribui na un optimal calidad di servicio pa nos cliente y nan famia.

Fundashon ta miembro di e plataforma Dementie Aruba, caminda hunto cu e otro partners den cuido nos ta trata di innova y mehora e cuida caminda cu por. E otro miembronan ta WGK, SABA, HAVA, DsZ.

Cu fundashon SABA nos tin un samenwerkingsovereenkomst caminda tin stipula cu nos ta traha hunto caminda tin e necesidad.

---