Esaki ta significa cu e personanan cerca lo tin cu bai adapta y acepta esaki. Pa por anda di un bon manera cu un persona cu demencia ta exihi hopi di un persona. Nos tin algún conseho cu kisas por yuda den esaki.
Trata di buska coneccion na e mundo / pensamento di e persona cu demencia.
Ta importante pa trata di conecta cu e persona y su pensamento. Pa un persona cu tin demencia tin vez ta difícil kico su propio identidad ta of tawata. E persona hopi vez ta bringa pa haña rason den su pensamento y identidad.
Brinda un rutina
Persona cu tin un syndroma di demencia ta experiencia dificultad cu pensamento y no por confía mas riba nan propio memoria. Un structura diario ta brinda rutina y ta trece claridad. Trata di mantene orario fiho pa lanta foi cama, desayuna y come merdia etc.
Crea un pauze regular durante dia
Un celebro cu no ta traha optimal ta traha mayoria vez overtime. Pa es motibo e ta usa hopi energía. Hopi importante ta pa no planea e dia dimas yen y pa crea momento di rust y sosiego durante e dia.
Stimula e sentido
Na momento cu mas sentido wordo stimula simultaneamente e chens ta mas grandi cu informacion ta wordo mas mihor imprimi y retene den e celebro. Por ehempel e frase “ban sinta na mesa” lo duna mas impresion si e persona ta wak na momento cu ta bisa e frase un mesa drecha caminda tin tambe e cuminda den tayo cu por disfruta di e dushi aroma di e cuminda.
Sostene e nocion di tempo
Un calendario y un oloshi grandi caminda e por wak e fecha y dia di siman ta consehabel. Stimula e persona pa hasi uso durante dia di e oloshi y calendario.
Movecion regular
Ta consehabel pa hasi 30 minut pa dia na movecion, ideanan por ta pa baila, cana, traha den cura etc.
Brinda actividad durante dia
Ta consehabel pa brinda un rutina cu diferente actividad. Esaki ta pa stimula e persona ypa mantene e abilidadnan. Otro posibilidad ta pa stimula e persona pa participa na un centro di actividad. CasMarie por brinda mas información tocante esaki.
Informa famia y amistad
Dor di comunica cu famia y amistad por preveni cu por surgi problema den comprencion. Importante ta pa tur persona envolví ta riba e mesun liña.
Importante ta pa papia cu e yiu y nietonan
Yiunan mayoría vez ta ripara cu tin algo ta pasa. Pa mantene e contacto y comprencion entre e yiunan (nietonan) ta importante pa informa kico ta significa e syndroma di demencia y con por anda cu e cambionan aki. Trata di splica cu mester tene pasenshi ora e persona ta ripiti of ta actua kisas poko straño. Splica cu tur esakinan ta symptoma di un malesa den e celebro.
Evita e sentimiento di desapunto
Si constantemente e persona ta wordo corihi y ta wordo mustra riba lokual a bai malo e persona por bira tristo, rabia of aparta su mes. E persona kisas no por comprende dicon e tin e dificultadnan y ta sinti berguensa of ta frustra y rabia. Si e persona no ta comprende mas dicon e ta hasi algo robez y no sa con pa drecha esaki no ta consehabel pa keda corihi un persona constantemente.
Adapta e comunicacion.
Tene cuenta cu e dificultadnan di un persona cu demencia. Na prome lugar zorg pa e persona mustra su atención prome cu bisa un información. Zorg pa e contacto visual tey (wak e persona den wowo) ora di hasi uso di frase cortico y simpel. No formula frase cu tin mas cu un pregunta den dje. Duna e persona tempo pa reaciona y asegura cu e persona a tende y comprende e pregunta.
Brinda un hogar sigur
Na momento cu e demencia avansa por pasa cu e persona no tin nocion di kico ta sigur y kico no. Hopi importante ta pa evita accident dor di minimalisa desgracia den cas. Kisas por pensa riba uso di extra mas / leuning pa tene den baño. Por consulta ergoterapia pa esaki via HOH. Tambe ta importante pa warda obheto cu por ta peligroso ( clorox, remedi, cuchiu, sker etc).
No lubida bo propio persona!
No ta fácil pa cuida y ofrece calidad di vida na un ser keri cu demencia. Hopi importante ta pa por tin tambe momento pa relaha y diberti. Tambe ta un conseho pa ta na altura di e ultimo desaroyo tocante demencia y pa participa na un grupo di contacto pa famia cu por fungi como un grupo di sosten. Pa mas informacion por tuma contacto cu CasMarie su grupo di contacto y sosten.
